हे नववर्षा

December 30, 2016

लेखन

arvind jagapat patra

नववर्ष कविता

नववर्ष कविता
कुस बदलावी तशी बदलतात वर्षं
जांभई सारखा सुरु होतो दिवस
लाखो बकरे आणि कोंबड्यांची पुण्यतिथी
असते एकतीस डिसेंबरला
तरीही एक जानेवारीला कोंबडा आरवतो कसा?
मागच्या वर्षी रस्त्यावर पडला होता
या वर्षी नवरा घरी येऊन पडला
या सुखात असतात कित्येक बायका.
एक जानेवारीचा सूर्य वाट चुकल्यासारखा
माणसं शोधत असतो पहाटे पहाटे
कचरेवाल्यांचा आनंद गगनात मावत नाही
बाटल्यांचा ढीग बघून.
लालभडक डोळे दिसतात सगळीकडे
असं वाटतं जनतेच्या डोळ्यात आग आहे
पब्लिकच्या मनात राग आहे
या वर्षी नक्की लोक पेटून उठतील
सारं काही बदलेल.
पण खरंतर कॅलेंडर शिवाय काहीच बदलत नाही
आणि हो…
हे नववर्षा
पुढचे काही दिवस २०१७ च्या ऐवजी आम्ही
२०१६ च लिहिणार आहोत चुकून.
रागवू नकोस
आम्ही सहजा सहजी बदलत नाही
आणि बदल स्वीकारतही नाही.
तरीही तुझं स्वागत आहे.
ज्यांच्या जाण्याची तारीख ठाऊक असते
त्या पाहुण्याचं आम्ही मनापासून स्वागत करतो.

– अरविंद जगताप

कानडीनें केला मराठी भ्रतार । एकाचें उत्तर एका न ये ।
तैसें मज नको करूं कमळापति । देई या संगति सज्जनांची ।
- संत तुकाराम.

तुकोबा..फक्त आम्हाला एवढी बुद्धी द्या की सज्जन कोण तेही कळेल.

0 Comments

Submit a Comment

Your email address will not be published. Required fields are marked *